Il- Kapitlu Nazzjonali - okkażżjoni ta' djalogu u tiġdid.

Ejja nagħmlu mill-Kapitlu Nazzjonali okkażżjoni ta’ djalogu u tiġdid.

Il-membri kollha huma mħeġġa jissottomettu mistoqsijiet indirizzati lill-Ministru Ġenerali u lill-Assistent Ġenerali rigward l-operat taċ-Ciofs, il-formazzjoni, il-finanzi, il-qagħda tal-fraternitajiet lokali, ir-reklutaġġ ta’ membri ġodda, insomma dak kollhu li wieħed iħoss li għandu jistaqsi jew jesprimi biex l-Ordni u l-ispiritwalita’ Franġiskana jimxu l-quddiem f’dawn il-gżejjer.

Dawn il-mistoqsijiet bil-malti jew ingliż għandhom jintbgħatu lill-Ministru Nazzjonali, lis-Segretarju jew lili, l-Kunsillier Internazzjonali, preferibilment b’email kemm jista’ jkun malajr, biex jiġu tradotti bit-taljan, ivvettjati mill-Kunsill Eżekuttiv, u jintbgħatu lill-Ministru Ġenerali. Wieħed irid japprezza li dan kollhu jinvolvi ħafna xogħol u għalhekk aktar mal-mistoqsijiet jintbgħatu malajr aktar ikun aħjar.

Kulħadd huwa mħeġġeġ biex jagħmel mill-aħjar biex dan il-Kapitlu nagħmluh mument ta’ djalogu, rinnovament u grazzja. Hu mistenni li għal dan il-għan isir talb fil-Fraternitajiet tul ix-xaħar ta’ Mejju.

Talba għall-Kapitlu Ġenerali tal-Ordni Franġiskan Sekular
L-Aktar Għoli u Glorjuż Alla, aħna Nfaħħruk għall-preżenza Tiegħek fid-dinja u għad-don prezzjuż tal-vokazzjoni Franġiskana.

Nitolbuk tnebbaħ lill-ħutna Franġiskani Sekulari hekk kif qed inħejju għall-Kapitlu Nazzjonali.

Agħti l-għerf meħtieġ lill-ħutna li se jieħdu sehem fil-Kapitlu biex joħorġu l-prioritajiet tal-Ordni għat-tlett snin li ġejjin u jaħtru l-dawk li Int trid li jmexxuna u janimawna.

Mexxina u dderiġina biex nimxu fuq l-Vanġelu u r-Regola tagħna aktar mill-qrib, ħa nkunu ħaddiema Miegħek fil-bini mill-ġdid tal-Knisja u d-Dinja.

Nitolbuk dan f’isem Kristu Sidna u bl-interċessjoni tal-Imbierka Verġni Marija, San Franġisk, Santa Kjara u l-qaddisin patruni tagħna Santa Eliżabetta u San Luiġi

Amen.

Programm tal-Viżta Fraterna mill-Ministru Ġenerali fl-okkażjoni tal-Kapitlu Nazzjonali

l-Erbgħa 2 ta' Ġunju:- Il-Ministru Ġenerali Is-sinjura Encarnation del Pozo flimkien mal-Assistent Ġenerali Fr. Ivan Matic jaslu Malta’ (bejn wieħed u ieħor għas-2.30 pm.). Nilqugħhom l-Airport u jitwassalu “Rivotorto” fejn se joqgħodu.

Fil-5.30 p.m :- il-Ministru Ġenerali flimkien mal-Assistent Ġenerali tiltaqa mal-Kunsill Eżekuttiv fejn issir il-konferma ta’ dokumenti, il-kontabilita’ finanzjarja, u l-programm ta’ formazzjoni kif ukoll il-lista’ tal-membri .

Il-Ħamis 3 ta' Ġunju
9.00 a.m.:-Il-Ministru Ġenerali u l’Assistent Ġenerali flimkien mat-tlett Assistenti Nazzjonali, il-Ministru Nazzjonali u l-membri tal-Kunsill Eżekuttiv jiltaqgħu mal-Eċċellenza Tiegħu l’Arcisqof ta’ Malta’ Paul Cremona O.P. fir-residenza privata tiegħu f'Ħ'Attard.
10.30 a.m.:- Il-Ministru Ġenerali u l’Assistent Ġenerali flimkien mat-tlett Assistenti Nazzjonali u l-Ministru Nazzjonali jiltaqgħu mal-Provinċjali tat-tlett Familji tal-Ordni Franġiskan fil-kunvent tal-Kapuċċini l-Kalkara.
5.00 p.m. :- il-Ministru Ġenerali u l’Assistent Ġenerali jiltaqgħu mal-membri tal-Kunsilli tal-Fraternitajiet lokali f’Rivotorto, B’Kara.
6.00 p.m. :- Laqgħa mal-Franġiskani Sekulari kollha fl-istess post, jiġifieri fis-sala f’Rivo Torto, B’kara. Kull Franġiskan hu fid-dmir li jattendi għal din il-laqgħa unika mal-Ministru Ġenerali li ġejja propju biex tiltaqa mal-Franġiskani Sekulari kollha - individwalment. Il-ministri tal-Fraternitajiet ingħataw struzzjonijiet għall-preparamenti li għandhom isiru għal dak inhar biex din il-laqgħa tagħti frott u tħeġġeġ fina l-appartenenza w il-parteċipazzjoni fl’Ordni.
7.00 p.m. :- Adorazzjoni Ewkaristika – bħala velja ta’ talb qabel il-Kapitlu (iddum bejn wieħed u ieħor nofs siegħa)

Il-Gimgħa 4 ta' Ġunju
3.15 p.m. :- Jibda f’Rivotorto l-Kapitlu Nazzjonali b’mument ta’ talb segwit mill-introduzzjoni tat-Tema tal-Kapitlu “Nkunu Xhieda” mill-Ministru Nazzjonali.
Wara l-Ministru Nazzjonali jsellem il-Ministru Ġenerali u l’Assistent Ġenerali u dawn iwieġbu u jindirizzaw id-delegati.
3.45 p.m. :- Preżentazzjoni tar-rapport tal-Ministru Nazzjonali. Wara mistoqsijiet u diskussioni mid-delegati.
4.30 p.m. :- Preżentazzjoni tar-rapport tal-Assistenti Nazzjonali u warajh mistoqsijiet u kjarifiki
5.00 p.m.:- Preżentazzioni tar-rapport Finanzjarju segwit minn mistoqsijiet u kjarifiki.
5.15 p.m.:- Waqfa għall-Kafe
5.45 p.m.:- Preżentazzjoni tar-rapport ta’ Formazzjoni
6.00 p.m.:- Diskussjoni fuq ir-rapporti ppreżentati.
7.00 p.m.:- Ngħalqu bit-talb ta’ fil-għaxija.

Sibt 5 ta' Ġunju
9.00 a.m.:- Talb ta’ fil-Għodu u talb lill-Ispirtu Santu - immexxi mill-Assistent Internazzjonali flimkien mat-tliet Assistenti Nazzjonali.
9.30 a.m.:- il-Ministru Ġenerali xxolji l-kunsill Eżekuttiv u tippresjedi l-elezzjoni għall-ħatra ta’ wieħed ġdid għall-2010-2013. Waqt li telenka l-punti essenzjali tal-proċess.
Hawn issir l-elezzjoni ta’ segretarju u żewġ skrutiniera għall-kapitlu u wara jibdew l-Elezzjonijiet. 10.30 a.m. :- Waqfa għall-Kafe
11.00 a.m.:-Tibda l-elezzjoni ppreseduta mill-Ministru Ġenerali.
12.15 p.m.:- Waqfa għall-Ikel
2. 00 p.m.:- tkompli l-elezzjoni
Hekk kif jiġi elett il-Kunsill kollu, jingħalaq il-Kapitlu bl’ Ewkaristija.

Il-Ħadd 6 ta’ Ġunju
Fil-għodu l-Ministru tiltaq mal-Kunsill il-ġdid f’ħin li jiġi stabbilit fil-ġurnata’ ta’ qabel.
12.30 p.m. – Tluq għall-Airport

Mill-Fraternita tal-Floriana

Il-Fraternita tal-OFS Floriana xtaqet, permezz tal-website tal-Kunsill Nazzjonali tal-OFS, tifraħ lid-direttur spiritwali tagħha Patri Frans Abela Giusti f’għeluq il-50 sena bħala Presbiteru Kappuċċin. Hu ġie maħtur fit-2 ta’ April 1960 u peress li din is-sena f’dik id-data taħbat il-Ġimgħa l-Kbira, it-tifkira ta’ dan l-anniversarju ġie ċċelebrat b’Quddiesa fil-knisja tal-Kappuċċini l-Floriana, nhar il-Ġimgħa 19 ta’ Marzu, festa ta’ San Ġużepp.

Patri Frans serva bosta drabi fil-Kunsill Nazzjonali bħala Assistent Spiritwali u għen ħafna għall-għaqda u fit-twaqqif tiegħu. Patri Frans jidher it-tieni wieħed mix-xellug fir-ritratt.

Il-Kunsill Nazzjonali jingħaqad mal-Fraternita fl-Awguri tagħhom lill-Patri Frans u ukoll jawguralu l-isbaħ affarijet.

Flimkien ma’ Patri Frans kellhom l-Anniversarju wkoll Patri Charles Cardona u Patri Modest Gatt. Il-Fraternita ħasset li din hi aħbar sabiħa li xtaqu jaqsmuha ma’ ħuthom t-terzjarji kollha.

Elezzjonijiet f'Marija Reġina

Illum wara nofs inhar nżammet l-elezzjoni għall-Kunsill ġdid fil-Fraternita' ta' Maria Reġina fil-Marsa. Barra l-Ministru Nazzjonali attendew għall-elezzjoni wkoll membri tal-Kunsill Eżekuttiv. Din il-fraternita' tħaddan 36 membru u għandha 8 novizzi li mixjin biex jidħlu fl-Ordni. Dan l-aħħar b'imħabba u support li ingħatat rnexxielha tegħleb iż-żmien ftit diffiċli li għaddiet minnhom u illum għall-grazzja t'Alla għanda Kunsill ġdid li nawgurawlu jkompli jaħdem bil-ħeġġa li beda biha. Il-membri li nħatru u li jidrhu hawn taħt qed jieħdu il-ġurament tal-ħatra huma

Ministru :- Nathalie Mallia
Viċi Ministru:- Gejta Farrugia
Segretarja:- Mary Sammut
Kaxxiera:- Doris Attard
Membri:- Sylvia Debono

Nawguraw il-Kunsill ta' din il-Fraternita ħidma siewja biex iġib il-quddiem il-Kariżma Franġiskana fost dawn il-membru u fl'inħawi.

Rtir tar-Randan organiżżat mill-Fraternita' tal-Kalkara

Illum fin-nofs ta' nhar ta' fil-ġħodu nżamm irtir tar-Randan organiżżat mill-Fraternita' tal-Kalkara. Sena wara l-oħra dan l-Irtir qed isir popolari ma ħafna Fraternitajiet. Xhieda ta' dan kienet l-attendenza numerusa minn ħames Fraternitajiet. Barra mill-membri tal-Kalkara kien hemm dawk minn Għajn dwieli, Rabat, Marsa Trinita, San Gwann u l-Furjana li mlew is-sala kif wieħed jista jara mill-filmat.

Mexxa l-Irtir Patri Joe Buttigieg Ofm.Cap li tkellem fuq l-imħabba t'Alla u u il-mod kif ngħarfuh u li żamm l-attenzjoni ta' kulħadd fuq dak li kien qed jgħid, xi drabi ukoll b'xi cajta l'hemm u l-hawn. Hi ħaġa sabiħa ħafna li wieħed jgħaraf jiltaqa mal-Mulej u mal-aħwa. Hemm il-bzonn li nkunu nafu aktar il-Mulej u lill-xulxin. Hija karateristika Franġiskana li qegħda fir-regola biex nimxu lejn il-Mulej flimkien. Nittamaw li dan l-ispirtu u l-attendenza jirrifletti rwiehom f'irtiri oħrajn li jiġu organizzati minn żmien għal żmien.

Nirringrazzjaw il-Kunsill tal-Kalkara li organizza l-irtir kif ukoll il-Fraternitajiet li ikkollaboraw u ħadu sehem.

Ċeremonja tad-dħul ta' membri ġodda f'Birkirkara.

Nhar il Hadd li għadda saret ċeremonja ta dħul ta' ħames membri ġodda fil-Fraternia ta' Birkirkara. Dawn kienu Josett u Joseph Aquilina, Steve Attard li hu wkoll seminarista, u Peter u Carmen Saliba.
Fir-ritratt jidrhu (mix-xellug għall-lemin) Josette u Joseph Aquilina, Peter (Ministru), Godwin (Min.Nazz.) Patri Alfred Calleja OFM Conv. Assistent, Steve Attard u Peter u Carmen Saliba.


Steve Attard (is-Seminarista) ġej mill-Mosta, Joseph u Josette Aquilina ġejjin mir-Rabat (Malta) waqt li Peter u Carmen Saliba joqgħodu l-Gharghur. Dawn iż-żewġ koppji it-tnejn għandhom uliedhom novizzi mal-Konventwali u li bħalissa jinsabu jistudjaw Assisi.


Il-Fraternita' xtaqet taqsam dan il-ferħ għax barra li laqgħet din iż-żieda sostanzjali ħasset ukoll li llum inkitbet pagna ġdida fl-OFS peress li qatt qabel ma kien hemm seminarista li beda l-mixja tiegħu fl-OFS.

Steve Attard mill-ewwel wera ħafna entuzjasmu u ħeġġa li ma bħala biex jissieħeb f'dan l-Ordni tagħna. J'Alla l-quddiem, meta jipprofessa, ikun strumentali biex bis-saħħa tieghu, l-OFS ikompli jikber u jissaħħaħ. Aħna nibqgħu nitolbu mhux għalih biss, imma wkoll għal kull min beda din il-mixja fl-Ordni Franġiskan Sekular, kif ukoll għal kull min jixtieq jibdija. Steve għandu bżonn ħafna talb, mhux biss biex jagħraf jimxi l-mixja spiritwali tiegħu, imma wkoll biex ikun saċerdot qaddis, veru appostlu li jwassal il-kelma t'Alla lill-bnedmin. Omna Maria, Missierna San Franġisk, Santa Klara u Santa Eliżabetta żgur li sa jkunu miegħu f'dak kollu li jkollu bżonn.

J'Alla il-Mulej ibierek lill dawn ħutna ġodda u jgħinhom jimxu t-triq li hu wriehom mejuna minn ħuthom.

Professi Ġodda fil-Fraternita tal-Kalkara

Il-Lum fil-Knisja ta' Santa Barbra fil-Kalkara saret il-Professjoni ta' sitt membri ġodda tal-OFS li żdiedu mal-Fraternita' ta' Santa Liberata li tiltaqa' fil-Kunvent tal-Kapuċċini hawnhekk. Il-membri professi ġodda huma mix-xellug għall-lemin: Sylvia Azzopardi, Miriam Bonello, Norbert Agius, Tony Azzopardi, Johann Grech, u Jennifer Lonfat. Anglu Demanuelle (xellug) huwa l-Mastru tal-Formazzjoni, u Joe Caruana (lemin) Ministru tal-Fraternita'.

Il-Ministru Nazzjonali indirizza l-membri preżenti qabel iċ-ċerimonja li ġiet immexxija mill-Assistent Spiritwali tal-Fraternita' Fr. Hayden OFM. Cap Williams megħjun minn Fr. Godfrey Zarb OFM.Cap. Laqa' il-professi l-ġodda fil-fraternita' il-Ministru tal-fraternita' Joe Caruana.

Is-sitt membri l-ġodda għaddew minn sentejn novizzjat intensiv li juru b'liema serjeta l-formazzjoni inizjali qed tittieħed minn din il-fraternita' biex twassal il-membri ġodda tagħha għall Professjoni.

Waqt li nifirħu l-membri l-ġodda kif ukoll lil din il-Fraternita' għal din l-għotja ta' Aħwa ġodda, nittamaw li fraternitajiet oħrajn jieħdu bl'istess serjeta l-formazzjoni tal-membri tagħhom għall-ġid ta' l-Ordni fi gżiritna.

Wara iċ-ċerimonja, kif inhu tradizzjonalment f'din il-fraternita', il-fraternita' ngħaqdet f'bibita vera tajba biex tiċċelebra dan l-avveniment kif ukoll il-Milied u l-Ewwel tas-Sena.